RhCM Cymru yn penodi Cyfarwyddwr newydd

Mae Rhwydwaith Cydraddoldeb Menywod Cymru yn falch iawn o gyhoeddi bod Victoria Vasey wedi’i phenodi’n Gyfarwyddwr newydd y sefydliad, gan olynu Catherine Fookes sy’n rhoi’r gorau i’r swydd ar ôl chwe blynedd. Bydd Victoria yn dechrau yn y rôl ar 25 Medi.

Mae Victoria yn ymuno â RhCM o’r Human Dignity Trust, lle fel Pennaeth Cyfreithiol bu’n gyrru’r genhadaeth i amddiffyn hawliau pobl LHDT yn fyd-eang gan ddefnyddio’r gyfraith.

“Mae’n anrhydedd cael ymuno â RhCM Cymru, gan gofio, wrth i’r argyfwng costau byw barhau i frathu ac anghydraddoldebau ddyfnhau, fod cenhadaeth WEN yn bwysicach fyth. Edrychaf ymlaen at weithio gyda’r tîm gwych yn RhCM Cymru a rhwydwaith pwerus o aelod-sefydliadau ledled y wlad i adeiladu ar lwyddiannau’r gorffennol ac i ymdrechu i wneud hwn yn lle gwell a thecach i bob merch.” — Victoria Vasey

“Mae Victoria yn dod â chyfoeth o arbenigedd mewn cydraddoldeb gyda hi, ar ôl cyfreitha achosion hawliau dynol strategol gerbron Llys Hawliau Dynol Ewrop, y Pwyllgor Ewropeaidd ar Hawliau Cymdeithasol a chyrff cytuniadau’r Cenhedloedd Unedig. Bydd ehangder ei phrofiad yn ein helpu i barhau i adeiladu ar effaith a dylanwad RhCM Cymru i sicrhau newid ar yr adeg hollbwysig hon. Rydym yn edrych ymlaen at weithio gyda hi dros Gymru sy’n rhydd o wahaniaethu ar sail rhywedd, wrth i ni ddechrau’r cyfnod newydd hwn yn RhCM.” – Mary Ann Brocklesby, Cadeirydd RhCM Cymru

Mae hyn yn golygu, wrth gwrs, ein bod yn ffarwelio â Catherine Fookes.

“Mae Catherine wedi bod yn gyfarwyddwr rhagorol i RhCM Cymru. Mae hi wedi adeiladu sefydliad cryf, cydweithredol sy’n cynrychioli amrywiaeth lleisiau a phrofiadau menywod ledled Cymru. Trwy ei harweinyddiaeth, mae RhCM wedi tyfu mewn niferoedd ac mewn dylanwad. Byddwn yn gweld ei heisiau ac yn dymuno’n dda iddi hi yn ei mentrau newydd. Rydym yn gwybod beth bynnag y bydd yn ei wneud, y bydd yn parhau i fod yn hyrwyddwr dros Gymru gynhwysol, gyfartal sy’n rhydd o wahaniaethu.” – Mary Ann Brocklesby, Cadeirydd RhCM Cymru

“Mae wedi bod yn anrhydedd enfawr i arwain RhCM Cymru dros y chwe blynedd diwethaf – rydw i wedi mwynhau pob munud ohono. Hoffwn dalu teyrnged i’n tîm staff anhygoel yn RhCM. Mae eu hymroddiad, eu hangerdd a’u harbenigedd heb eu hail a byddaf yn gweld eisiau pob un ohonynt yn fawr.

Rwyf hefyd am ddweud diolch yn fawr iawn i’n holl bartneriaid a chyllidwyr anhygoel yr wyf wedi gweithio gyda nhw ac wedi dysgu oddi wrthynt, sydd oll wedi sicrhau ein bod wedi cael effaith llawer mwy nag y gallem ei chael ar ein pen ein hunain.

Yn olaf, hoffwn ddiolch i Fwrdd yr Ymddiriedolwyr sydd wedi bod yn gwbl gefnogol ac wedi ymgorffori ein gwerthoedd RhCM o ddidrugaredd, cyfrifoldeb a charedigrwydd.

Rwy’n gwybod y bydd RhCM Cymru mewn dwylo diogel gyda’n Cyfarwyddwr nesaf ac y bydd yn parhau’n gryf ar ei thaith i sicrhau Cymru sy’n rhydd o wahaniaethu ar sail rhywedd.” – Catherine Fookes