Ymddiriedolwyr

Mae ymddiriedolwyr RhCM Cymru yn cael eu hethol am gyfnodau o dair blynedd, a gallant sefyll am ail dymor os ydynt yn dymuno gwneud hynny.

Mae’r ymddiriedolwyr yn rhan o’n Pwyllgor Rheoli, sy’n gyfrifol am ddatblygiad strategol a llywodraethu ein sefydliad.

• Mary Ann Brocklesby

  Cadeirydd

  Mae Mary Ann wedi treulio ei bywyd yn sefyll dros hawliau pobl ledled y byd. O ymgyrchu dros well cefnogaeth i oroeswyr cam-drin rhywiol, i wneud i leisiau pobl mewn tlodi gyfrif wrth ddarparu Cymorth Rhyngwladol. Am 30 mlynedd, mae hi wedi gweithio ar draws Asia ac Affrica ar ddatblygu cymunedol, cydraddoldeb rhywiol a grymuso menywod. Mae Mary Ann wedi gweithio mewn canolfannau argyfwng trais rhywiol ac wedi darlithio mewn Astudiaethau Datblygu ac mae bellach yn rhedeg ei busnes cyngor a hyfforddi rhyngwladol ei hun. Mae hi’n gynghorydd tref ac yn llywodraethwr ysgol ac, fel myfyriwr graddedig balch o gynllun mentora WEN, cafodd gefnogaeth i sefyll yn etholiadau’r Senedd ym Mai 2020. Mae hi’n gymrawd o Gynghrair Fyd-eang Pob Menyw.

  

• Elizabeth Evans

  Is-Gadeirydd

  Mae gan Elizabeth fwy nag 20 mlynedd o brofiad mewn newid trawsnewidiol, strategaeth a rheoli prosesau ar draws y sectorau preifat, cyhoeddus a gwirfoddol. Gydag ymrwymiad i gael effaith gadarnhaol, mae hi’n dod â’i phrofiad helaeth o wireddu risg a buddion strategol i’r bwrdd.Arweiniodd ymrwymiad Elizabeth i faterion cydraddoldeb at sefydlu’r Rhwydwaith Merched cyntaf yn y Bathdy Brenhinol, gan ymgysylltu ag 20% o’r gweithlu mewn gweithgareddau, yn ogystal â chydweithio â darparwyr gwasanaethau lleol ac arweinwyr grwpiau cymunedol.Mae Elizabeth yn gyffrous i gael swydd ar y bwrdd, ar ôl ennill lle yn flaenorol ar raglen Step to Non-Exec Chwarae Teg a chysgodi’r bwrdd am flwyddyn.

  

• Suzy Davies

  Trysorydd

  Daliodd Suzy nifer o swyddi Gweinidogol Cysgodol yn ystod ei deng mlynedd yn y Senedd. Gwasanaethodd ar amryw bwyllgorau a chyd-gadeiriodd y Grŵp Trawsbleidiol ar Fenywod. Y fenyw gyntaf i sefyll dros arweinyddiaeth grŵp Ceidwadol Cymru, mae hi ar hyn o bryd yn gyd-gadeirydd Sefydliad y Merched Ceidwadol. Mae hi hefyd yn gadeirydd Women2WinWales; mae’r ddau sefydliad yn hyrwyddo cydraddoldeb rhywiol mewn swyddi etholedig. Cyn iddi ddod yn AS, bu Suzy yn gweithio ym maes rheoli’r celfyddydau ac fel cyfreithiwr. Ers camu yn ôl o wleidyddiaeth rheng flaen, fe’i penodwyd yn Gadeirydd Cynghrair Twristiaeth Cymru ac mae ar fyrddau Colegau Cymru ac Allgymorth Gŵyl Ffilm Gwobr Iris. Mae hi’n falch iawn o ymuno â Bwrdd RhCM.

  

• Nina Durant

  Ymddiriedolwr

  Wedi’i geni a’i magu yng nghymoedd De Cymru, mae Nina wedi treulio’r rhan fwyaf o’i gyrfa yn gweithio mewn lleoliad llywodraeth. Mae ganddi brofiad o broffesiynau cyfathrebu, polisi ac Adnoddau Dynol, ac mae hi wedi ennill statws Aelodaeth Siartredig y Sefydliad Siartredig Personél a Datblygu. Mae Nina bob amser wedi bod yn angerddol am faterion cydraddoldeb, yn enwedig y rhwystrau systemig sy’n dal i effeithio ar ganlyniadau i fenywod a merched heddiw, ac ar hyn o bryd mae’n fentor i fenywod o gefndiroedd economaidd-gymdeithasol is sydd am ddatblygu eu gyrfaoedd.Fel mam i ddau o blant ifanc sy’n hoff o chwaraeon, mae Nina’n treulio’r rhan fwyaf o’i hamser hamdden wrth ochr cae pêl-droed, boed law neu hindda!

  

• Katy Hales

  Ymddiriedolwr

  Katy yw cyfarwyddwr dyngarwch Sefydliad Cymunedol Cymru. Mae ei swydd yn ymwneud yn bennaf â chysylltu â dyngarwyr posibl, tra’n meithrin cefnogwyr presennol y Sefydliad. Mae’n gweithio mewn partneriaeth â chynghorwyr cyfreithiol ac ariannol i baru eu cleientiaid â’r grwpiau cymunedol ac ardaloedd daearyddol sy’n gweddu orau i’w dymuniadau dyngarol. Mae hi wedi gweithio yn y sector academaidd a’r trydydd sector ers dros 13 mlynedd, ac wrth ei bodd yn cael swydd y mae’n ei mwynhau ac sy’n cael effaith ystyrlon ar fywydau pobl. Mae hi’n frwd dros wella bywydau menywod a merched yng Nghymru, a gwneud yr hyn a all i helpu RhCM Cymru i gyflawni eu nodau.

  

• Jennifer Ramsay

  Ymddiriedolwr

  Astudiodd Jenny Saesneg ym Mhrifysgol Abertawe, gan gwblhau ei gradd Meistr yn 2008 ac ers hynny mae wedi gweithio yn y Senedd fel cynghorydd gwleidyddol. Mae hi’n wirioneddol angerddol am gynyddu amrywiaeth yng ngwleidyddiaeth Cymru a bywyd cyhoeddus. Mae hi eisiau gweld menywod mwy amrywiol fel arweinwyr a llunwyr penderfyniadau yng Nghymru a helpu i ddatblygu polisïau sy’n hyrwyddo cydraddoldeb rhywedd ac sy’n arwain at fwy o fenywod yn cymryd rhan mewn bywyd gwleidyddol a chyhoeddus. Mae hi’n Fentor yng nghynllun mentora Pŵer Cyfartal Llais Cyfartal ac mae’n fam i fachgen disglair a bownsiog iawn o’r enw James.