Mentora RhCM: Mae fy mywyd wedi cael ei drawsnewid

Thursday May 13th, 2021

Ym mis Rhagfyr 2020, daeth ein trydydd Cynllun Mentora i ben. Cafodd deg ar hugain o ferched amrywiol o bob rhan o Gymru eu paru â menywod mewn bywyd gwleidyddol a chyhoeddus fel eu mentoriaid. Cymerodd mentoreion ran mewn cyfres o weithdai i’w hysbysu a’u grymuso i sefyll ar gyfer etholiadau seneddol 2021, byrddau cyhoeddus, llywodraethwyr ysgolion, swyddi ymddiriedolwyr, a rolau newydd yn ol eu dyheadau.

“Rydw i wedi bod wrth fy modd gyda phob elfen o’r cynllun, mae wedi bod yn gymaint o lawenydd ac wedi rhoi cymaint mwy i mi nag yr oeddwn i wedi’i ddisgwyl erioed. Rwy’n teimlo fy mod i wedi dysgu cymaint amdanaf fy hun, ond yn bwysicach fyth am eraill a’r rhwystrau sy’n wynebu cymaint o fenywod. Rwy’n teimlo’n llawer yn fwy hyderus ynghylch gwneud newid mewn ffordd cynhwysol. Mae wedi newid fy meddylfryd ac rydw i mor ddiolchgar am y cyfleoedd rydw i wedi’u cael.”

Er gwaethaf yr adfyd a wynebodd cyfranogwyr yn ystod blwyddyn anodd, rydym wrth ein bodd gyda’r adborth a gafwyd a chyflawniadau ein Mentai.

Adborth cynllun mentora 2020

“Mae 2020 wedi bod yn flwyddyn anodd iawn i gynifer o bobl, ac roeddwn yn ffodus iawn o gael y rhwydwaith newydd hwn o bobl a oedd yn fenywod amrywiol iawn, galluog iawn, yn cefnogi ei gilydd. Roedd cael lle diogel i wneud hynny yn amhrisiadwy.”

“Ni allwn erioed fod wedi dychmygu, yn amser Covid, yn ystod y cyfnod cloi, y gallai fy mywyd fod wedi ehangu cymaint … ac y gallem fod wedi gwneud cysylltiadau  a fydd yno am oes yn ôl pob tebyg, er nad ydym erioed wedi cyfarfod oherwydd cychwynnodd y cynllun yn ystod y cyfnod cloi a daeth i ben yn ystod y cyfnod cloi! Rwy’n credu bod hynny’n deyrnged go iawn i RhCM, eu bod wedi llwyddo i weithio allan sut i gyflawni cynllun sydd mor bersonol mewn sawl ffordd.”

“Mae’r buddion wedi bod yn enfawr, a gallaf ddweud yn wirioneddol fod fy mywyd wedi cael ei drawsnewid. Es i o fod â gwir ymdeimlad o ddatgysylltiad â’r lle rwy’n byw ynddo, i fod bellach yn llywodraethwr ysgol, yn gynghorydd tref, ac rydw i’n sefyll yn yr etholiad yn yr etholiadau Senedd sydd ar ddod [Mai 2021]. Ni allai dim o hyn fod wedi digwydd heb gynllun mentora RhCM.”

“Byddwn wir yn annog pobl i ymgeisio am y rhaglen fentora, mae’n rhoi mynediad i chi i gyfoeth o wybodaeth, cyfoeth o gefnogaeth, a chyfoeth o arweiniad. Byddwn yn annog menywod o liw yn arbennig i fynd am y rhaglen hon, credaf fod angen mwy o gynrychiolaeth arnom, mae angen mwy o fewnwelediad arnom o’r ffordd y mae cymdeithas yn siapio ein bywydau, ac mae angen inni ddod â hi i flaen bywyd cyhoeddus a gwleidyddol. Gwnewch gais am y rhaglen, ni fyddwch yn difaru.”